गर्भ

गुणसूत्रे प्रवास करत असतात अविरत
प्रेमाच्या मार्गाने जाताना
रस्त्यात येतात विविध मानव निर्मित
वंश धर्म जातीच्या व्याख्या
असतात मोठाल्या भिंती 
संकुचित पणाच्या सर्वत्र
तरी कधी असतात साखळ्या
मर्यादित विचार क्षमतेच्या
पण गुणसूत्रे प्रवेश करतात
प्रेमाच्या मार्गाने निसर्गाची आस धरत
वेली बनुन शिरतात
आत हजारो कुंपणाच्या
पसरवतात सुगंध वेली वरचे फुले
निसर्ग शह देतो
मानव निर्मित तोकड्या व्याख्यांना
कितीही छाटले तरी
पुन्हा पुन्हा उगवतात ती फुले
संक्रमण करतात गुणसूत्रे
सृजनाचा नवीन अविष्कार बनुन
व जन्मतात नव नवीन गर्भ
सृष्टीला नवीन अर्थ देऊन.

गर्भ - जतिन