विकास रेडी आहे

मोठ कॉन्ट्रॅक्ट निघालय
झाला खर्च तरी चालेल
ही समस्या अशीच निपटेल
याची आम्हाला खात्री आहे

खुप मोठी चादर हवी
बरच काही झाकायच आहे
सत्तर टक्के देश व्यापला जावा
एव्हड क्षेत्रफळ हवं आहे

उपचारा अभावी पडलेले रोगी
शिक्षणा अभावी सडणारी डोकी
उपाशी पोटी भटकणारे देह
चौफेर असलेली गरिबी
हे सारं काही विद्रुप आहे

खरं सांगतो तुम्हाला ही चादर
देशासाठीच हवी आहे
नाही पटलं तुम्हाला तर
पटवुन देणाऱ्या जाहिरातींचा
बजेट ही मोठा आहे

फक्त हे काम केलं की
पंचतारांकित हा देश आहे
बुलेट ट्रेन, मोठे पुतळे
दाखवण्यासाठी बरच आहे

बरच काही झाकुन
दिखावू विकास साधायचा
हा फार्मुला आजकाल
सहज साध्य आहे

तुम्ही म्हणाल हे शक्य नाही
एव्हडी मोठी चादर
मार्केट मध्ये मिळणार नाही

स्पष्ट सांगायचं तुम्हाला
तर चादर तयार आहे
ती टाकायचं काम ही
जोरात चालु आहे

चादर फाडुन कधी
बाहेर निघणार नाही
मोकळी हवा घेणारी डोकी
हिच खरी समस्या आहे

खरं सांगु तुम्हाला
आमचा विकास रेडी आहे .

__ जतिन

#jatinsankhepoetry

जीवनचक्र

पानगळ सुरू होते
काळ सरत जातो
झाड ओसाड होत जात
मग पुन्हा येते कोवळी
हिरवीगार पालवी
बहरून टाकते वृक्षाला

अंधार दाटुन येतो
रात्र सरकत जाते
सारं विश्व लुप्त होत
दाटलेल्या काळोखात
मग हलकेच येतात
कोवळी किरणे
नवीन ऊर्जा देत विश्वाला
थंडावलेल्या क्रिया
पुन्हा जाग्या होतात
व पळू लागतात
लाजवून वेगाला

शरीर भिजुन जाते घामाने 
तप्त धरणी आग ओकते
रविकिरने देवु पाहतात
कडक लाल पहारा
काळ सरू लागतो
काळे ढग जमू लागतात
सुटतो सोसाट्याच्या वारा
सुरू होतात पाऊस धारा
तृप्त होऊनी माती
बहरून येते हरित तृणांने
वाहु लागतात नद्या साऱ्या

अदृश्य होत समोरचं सार 
एवढ्या समस्या दाटुन येतात
चिंता अस्वस्थता असुरक्षितता
घेरून टाकतात जीवाला
वेळ शोधत असते
पर्याय आपल्या सोबत
तुम्ही तग धरून
टिकलात हिंमतीने
की वेळच देवु लागते उत्तरे 
सृष्टीचक्राच्या नियमाने

मग पुन्हा फुटते नवीन पालवी
कोवळी किरणे जागी करतात
वाहु लागतात पाऊस धारा ...

- जतिन #jatinsankhepoetry